نشب خلاف بين الفنان هانى شاكر، نقيب المهن الموسيقية، والمطرب عمر كمال، بعد إضافة الأخير جملة "تمور وحليب"، فى مهرجان "بنت الجيران"، حيث قال نقيب الموسيقيين، إنه من واجبنا أن نتحرك ضد أى إساءة لمصر، متابعا: "كلنا استفزنا كلام عمر كمال، واحنا مش بس بنتحرك علشان ولادنا.. احنا بنتكلم عن أبناء الأمة العربية كلها، وكل الأراضى العربية طاهرة ومقدسة.. أمال احنا بنضحى بولادنا ليه؟".

وأضاف هاني شاكر، فى اتصال هاتفى مع الإعلامى أحمد موسى، خلال تقديمه برنامج "على مسئوليتى" موجها كلامه لعمر كمال: "لما أنت عارف إن الكلام ده غلط بتغنيه هنا فى مصر ليه؟.. واحنا نستنهض الدولة كلها أن تساعد النقابة في تقنين أوضاع الموسيقى في مصر فى إنتاج الأغانى والمسرحيات فى مصر".

وتابع هانى شاكر: "أنا استغربت من جرأة عمر كمال إنه يقول الكلام ده، والناس مش مصدقة اللى بيحصل ده، وتم إبلاغ عمر كمال بالتحقيق وهو جاى بكرة، وهيحضر التحقيق، وهيكون في عقاب كبير.. ولما نشوف اللجنة هتقول إيه، وهناك مجموعة من الراب قدمت وبتاخد تصاريح وتوقع على إقرار للالتزام بالكلام، وهى محاولة مننا لاحتضان هذا اللون الجديد، والسيطرة على ما يحدث فى الساحة الفنية".

من جانبه قال عمر كمال، مطرب المهرجانات، إنه لا يمتلك أى حساب يخصه على موقع "تويتر"، وبالتالى التصريحات التى تم تداولها عن حفلته بالسعودية غير صحيحة، ولا تخصه قائلا: "ماعنديش حساب على تويتر.. وربنا بيقول إذا جاءكم فاسق بنبأ فتبينوا.. أنا ماحدش سألنى أنت غيرت كلام الأغنية ليه؟".

وأضاف كمال، فى مداخلة مع الإعلامي أحمد موسى، خلال تقديمه برنامج "على مسئوليتى": "أنا طلعت فى حفل بالسعودية، وغيرت كلمات الأغنية من زمان، والأغنية مفيش فيها أى كلمة مخالفة سواء فى مصر أو فى أى دولة عربية.. وأنا كنت بهرج مع الجمهور السعودى".

وتابع: "أنا ما اتكلمتش عن مصر ولا جبت سيرة مصر.. أنا عاوز أعرف ليه يتم التحقيق معى.. لا يوجد فيديو أو تسجيل قلت فيه الكلام ده، أنا ماقولتش السعودية أرض طاهرة ولا غيره.. أنا فوجئت إنى متحول للتحقيق.. وأنا بهرج مع الجمهور السعودى قلت (هشرب تمور وحليب) الناس ضحكت.. الناس بتعمل كوميك بتحط أى كلام على أى صورة والفيديوهات موجودة على صفحتى أنا قولت إيه".

وأكمل: "أنا طالع السعودية بفرقتى احتراما لقرار النقابة، مع إن برة ماحدش هيسألنى أنت هتغني بفلاشة ولا بفرقة، ولا حد أخطرنى إنى عندى تحقيق ولا أي حاجة".